ԱՆՆԱ ՊԱՆԻ` ԱՐՎԵՍՏԻ ԵՎ ՄՇԱԿՈՒՅԹԻ ՆԿԱՏՄԱՄԲ ՍԵՐՆ ԻՆՁ ՄՈՏ ՄԱՆԿՈՒՑ Է ԵՂԵԼ

- Որ տարիքից Ձեր մետ ցանկություն առաջացավ զբաղվել դերասանությամբ:

- Արվեստի և մշակույթի նկատմամբ սերն ինձ մոտ մանկուց է եղել, սակայն միայն գիտակցական տարիքում` երբ արդեն յուրաքանչյուր աշակերտ պետք է ընտրեր իր ապագա ուղին և մասնագիտությունը, ես նպատակ ունենալով իրականացնել իմ վաղեմի երազանքը, որն էր բեմն ու թատրոնը’ սկսեցի ավելի լուրջ զբաղվել այդ գործով,այսինքն, ավարտական դասարաններում սովորելուն զուգահեռ հաճախեցի թատերական խմբակ:

- Սիրում եք Ձեր աշխատանքը, և արդյոք հաճույքով եք կատարում:

- Այո, միանշանակ, այլապես չէի զբաղվի այս գործով, քանզի թատրոնն ու կինոն մեծ նվիրվածություն և սեր են պահանջում: Միայն սիրելով քո ընտրած մասնագիտությունը` դու կարող ես հաղթահարել այն բոլոր դժվարությունները, որոնք ծագում են նեղ մասնագիտական պրոցեսներում: Իսկ դերասանական արվեստը շատ խորը և զգացմունքային աշխարհ է, որտեղ միայն սիրով ու աշխատասիրությամբ կարելի է հասնել պրոֆեսիոնալիզմի:

- Ո՞վ է Ձեր սիրելի արտասահմանյան դերասանուհին:

- Դժվար է առանձնացնել կոնկրետ որևէ մեկին, սակայն այդ շնորհալի կանանցից կնշեմ` Սոֆի Լորենին, Մարգարիտա Տերեխովային և Մոնիկա Բելուչիին:

- Նրանցից որևէ մեկի և Ձեր միջև տեսնու՞մ եք նմանություններ:

- Հիանալով բազմաթիվ շնորհալի դերասանուհիների խաղով` ես հույս եմ փայփայում,որ կգտնեմ իմ ուրույն ուղին:

- Դե՞մ եք սերիալների գոյությանը:

- Չի կարելի դեմ լինել ժամանակակից արվեստին և սեփական աշխատանքին:Ուղղակի կարելի է երբեմն դժգոհ լինել որևէ ուղղությունից կամ ժանրից: Ես և իմ երիտասարդ կոլեգաները, ամեն ջանք գործադրում ենք, որպեսզի, վաղվա հեռուստասերիալները լինեն ուսուցանող:

                                       

- Ինչպես եք վերաբերվում այն մարդկանց, ովքեր մշտապես քննադատում և չեն գնահատում դերասանի աշխատանքը:

- Ես կողմնակից եմ առողջ քննադատության, սակայն դեմ եմ անհիմն բանբասանքներին:

- Եթե հայտնի դառնայիք Հոլիվուդում, չե՞ք կարծում, որ ավելի շատ գումար կարող էիք վաստակել և Ձեր աշխատանքն էլ կգնահատվեր:

- Միգուցե, սակայն կարծում եմ, որ մեր հայրենիքում էլ կարելի է լինել պրոֆեսիոնալ, գնահատվել այնքան` որքան այնտեղ:

- Ի՞նչ եք խորհուրդ տալիս սկսնակ դերասաններին:

- Ինչպես ասել է Ստանիսլավսկին` «Սիրրեք արվեստը Ձեր մեջ, ոչ թե ձեզ` արվեստում», սա ամենաառաջին և կարևոր պաըմանն ու խորհուրդն է:

- Ձեր կարծիքով ապագայում ավելի՞ կկատարելագործվեն հայկական սերիալները:

- Կյանքին և մարդկությանը բնորոշ է զարգացումն ու առաջընթացը: Ինչպես յուրաքանչյուր ոլորտում` այնպես էլ հեռուստասերիալներում և արվեստի մյուս ճյուղերում,  ապագայում կլինեն վերելքներ:

- Եվ վերջում, այս նյութով հետաքրքրվողներին ի՞նչ եք մաղթում:

- Բոլոր բոլորին մաղթում եմ անսահման երջանկություն և հավերժ երկկողմանի սեր: Աստված բոլորիս պահապան:

 

ԲՈԲՈ` ՄԱՎՐ ԱԼԵՔՍԱՆՅԱՆ